İşğal faktı rəqəmlərdə
Dağlıq Qarabağ: işğal tarixi - 1988-1992-ci illər, ərazisi - 4400 kv.km; Şuşa rayonu: işğal tarixi - 8 may 1992-ci il, ərazisi - 289 kv.km; Laçın rayonu: işğal tarixi - 18 may 1992-ci il, ərazisi - 1840 kv.km; Kəlbəcər rayonu: işğal tarixi - 2 aprel 1993-cü il, ərazisi - 3054 kv.km; Ağdam rayonu: işğal tarixi - 23 iyul 1993-cü il, ərazisi - 1150 kv.km; Cəbrayıl rayonu: işğal tarixi - 23 avqust 1993-cü il, ərazisi - 1050 kv.km; Füzuli rayonu: işğal tarixi - 23 avqust 1993-cü il, ərazisi - 1390 kv.km; Qubadlı rayonu: işğal tarixi - 31 avqust 1993-cü il, ərazisi - 802 kv.km; Zəngilan rayonu: işğal tarixi - 29 oktyabr 1993-cü il, ərazisi - 707 kv.km.

ATƏT-in Minsk qrupunun həmsədrləri bəyanat yayıblar

ATƏT-in Minsk qrupunun həmsədrləri bəyanat yayıblar

19.10.2014

ATƏT-in Minsk qrupunun həmsədrləri regiona növbəti səfərlərinin yekunu ilə bağlı bəyanat veriblər.

Trend ATƏT-in rəsmi saytına istinadən xəbər verir ki, bəyanatda həmsədrlər İqor Popov (Rusiya) və Pyer Andryö (Fransa) bu həftə hökumət rəsmiləri ilə görüşmək və Ermənistan-Azərbaycan sərhədində ATƏT tərəfindən keçirilən monitorinqində iştirak etmək üçün regiona səfər etdiklərini bildiriblər.

Bəyanatda qeyd olunur ki, keçirilən görüşlərdə ATƏT-in fəaliyyətdə olan sədrinin şəxsi nümayəndəsi Anjey Kasprşik də iştirak edib. Amerikalı həmsədr Ceyms Uorlik şəxsi səbəblərdən regiona səfər edə bilməyib, amma ABŞ tərəfi görüşlərdə təmsil olunub.

Bakıda və İrəvanda həmsədrlər iki ölkənin dövlət başçıları İlham Əliyev və Serj Sarkisyanla görüşüblər. Hər iki tərəflə görüş zamanı həmsədrlər Prezident Fransua Ollandın təklifi ilə bu ay Parisdə keçirilməsi planlaşdırılan prezidentlərin sammitinə hazırlığı müzakirə ediblər.

Həmsədrlər prezidentlərin Soçi və Uelsdə keçirilmiş ötən görüşlərindən də danışıblar, yay aylarında gərginliyin artmasından sonra təmas xəttində və sərhəddə vəziyyətin sabitləşdiyini qeyd ediblər. Onlar həmçinin son günlər baş verən atəşkəs pozuntularının kəskin hal almayacağına ümid etdiklərini bildiriblər. Həmsədrlər tərəfləri gərginliyi azaltmağa, xüsusilə mülki əhaliyə qarşı zorakılıqların qarşısının alınması üçün addımlar atmağa çağırıblar.

Qeyd edək ki, vasitəçilər 14-18 oktyabr tarixlərində regionda səfərdə olublar.