İşğal faktı rəqəmlərdə
Dağlıq Qarabağ: işğal tarixi - 1988-1992-ci illər, ərazisi - 4400 kv.km; Şuşa rayonu: işğal tarixi - 8 may 1992-ci il, ərazisi - 289 kv.km; Laçın rayonu: işğal tarixi - 18 may 1992-ci il, ərazisi - 1840 kv.km; Kəlbəcər rayonu: işğal tarixi - 2 aprel 1993-cü il, ərazisi - 3054 kv.km; Ağdam rayonu: işğal tarixi - 23 iyul 1993-cü il, ərazisi - 1150 kv.km; Cəbrayıl rayonu: işğal tarixi - 23 avqust 1993-cü il, ərazisi - 1050 kv.km; Füzuli rayonu: işğal tarixi - 23 avqust 1993-cü il, ərazisi - 1390 kv.km; Qubadlı rayonu: işğal tarixi - 31 avqust 1993-cü il, ərazisi - 802 kv.km; Zəngilan rayonu: işğal tarixi - 29 oktyabr 1993-cü il, ərazisi - 707 kv.km.

Ermənistan işğalının Azərbaycana vurduğu zərərin qiymətləndirilməsi üçün xarici ekspertlər cəlb olunur

Ermənistan işğalının Azərbaycana vurduğu zərərin qiymətləndirilməsi üçün xarici ekspertlər cəlb olunur

29.08.2015

Ermənistan işğalının Azərbaycana vurduğu zərərin qiymətləndirilməsi üçün İran, Moldova, Macarıstan, Almaniya, Türkiyə, Rusiya və bir çox ölkələrdən ekspertlər cəlb olunur. Bunu Trend-ə Ermənistanın təcavüzkar siyasəti nəticəsində Azərbaycana dəymiş zərərin qiymətləndirilməsi üzrə İşçi Qrupunun rəhbəri, Milli Məclisin deputatı Xanhüseyn Kazımlı deyib.

Deputat qeyd edib ki, zərərin qiymətləndirilməsi, ictimaiyyətə açıqlanması, dünyanın diqqətinə çatdırılması, bununla yanaşı, eyni zamanda, Ermənistanın əsl simasının göstərilməsi də əhəmiyyətli məsələdir: “Oktyabr ayında Ermənistan işğalının Azərbaycana vurduğu zərərin qiymətləndirilməsi üzrə xüsusi təlim keçirməyi planlaşdırırıq. Bunun üçün xarici mütəxəssisləri dəvət etmişik. Qiymətləndirmə zamanı Azərbaycan haqqında əcnəbi tarixçilər və alimlərin nəşr olunan materiallarından da istifadə edirik”.

X.Kazımlı bildirib ki, bu işi hər bir azərbaycanlı, Azərbaycan cəmiyyəti nəinki ölkə daxilində, həmçinin ölkə xaricində də aparmalıdır: “Ermənistanın Azərbaycana vurduğu zərəri sübuta yetirən məlumat, sənədə sahib olanlar bizə bu işdə kömək olmalıdırlar. Bu məsələ bütün Azərbaycan xalqı üçün əhəmiyyətli məsələdir”.

Qeyd edək ki, İşçi Qrupunun ilkin məlumatına əsasən, Ermənistanın Azərbaycan torpaqlarını işğal etdiyi illər ərzində vurduğu zərər təqribən 700 milyard dollar təşkil edir.