İşğal faktı rəqəmlərdə
Dağlıq Qarabağ: işğal tarixi - 1988-1992-ci illər, ərazisi - 4400 kv.km; Şuşa rayonu: işğal tarixi - 8 may 1992-ci il, ərazisi - 289 kv.km; Laçın rayonu: işğal tarixi - 18 may 1992-ci il, ərazisi - 1840 kv.km; Kəlbəcər rayonu: işğal tarixi - 2 aprel 1993-cü il, ərazisi - 3054 kv.km; Ağdam rayonu: işğal tarixi - 23 iyul 1993-cü il, ərazisi - 1150 kv.km; Cəbrayıl rayonu: işğal tarixi - 23 avqust 1993-cü il, ərazisi - 1050 kv.km; Füzuli rayonu: işğal tarixi - 23 avqust 1993-cü il, ərazisi - 1390 kv.km; Qubadlı rayonu: işğal tarixi - 31 avqust 1993-cü il, ərazisi - 802 kv.km; Zəngilan rayonu: işğal tarixi - 29 oktyabr 1993-cü il, ərazisi - 707 kv.km.

Xocalı soyqırımı ilə bağlı müraciət Avropa Parlamentində və Almaniya Bundestaqında rəsmən qeydiyyata alınıb

Xocalı soyqırımı ilə bağlı müraciət Avropa Parlamentində və Almaniya Bundestaqında rəsmən qeydiyyata alınıb

31.05.2014

Avropada yaşayan azərbaycanlılar Avropa Parlamentinə və Almaniya Bundestaqına (parlament) Xocalı soyqırımına hüquqi qiymət verilməsi ilə bağlı müraciət (petisiya) göndəriblər.

Bunu  açıqlamasında Avropa Azərbaycanlıları Konqresinin sədri, Almaniyadakı Azərbaycanlıların Koordinasiya Mərkəzinin icraçı direktoru Samira Patzer-İsmailova bildirib.

O qeyd edib ki, hər iki parlamentə rəsmi müraciət Avropada, müvafiq olaraq Almaniyada fəaliyyət göstərən Azərbaycan diaspor təşkilatları və burada yaşayan azərbaycanlılar adından ünvanlanıb: “Sevindirici hal odur ki, Avropa Parlamentində bizim müraciət formasında təqdim etdiyimiz soyqırımı ilə bağlı sənəd qeydə alınıb və hətta arxivləşdirilib. Bu artıq o deməkdir ki, müzakirəyə çıxarılıb-çıxarılmamasından asılı olmayaraq, Xocalı soyqırımı rəsmi sənəd kimi Avropa Parlamentinin arxivində rəsmi sənəd kimi saxlanılır. Uzun zamandır davam edən səylərimizə, əlaqələrimizə əsasən ümidimiz çoxdur ki, yaxın zamanda bu sənəd parlamentdə müzakirəyə çıxarılacaq və hansısa hüquqi qərar veriləcək”.

S.Patzer-İsmailova onu da deyib ki, müraciət Almaniya Bundestaqında da rəsmən qeydə alınıb: “Oradan da bizə bildirdilər ki, müraciət rəsmi sənəd olaraq müvafiq komitədə qeydə alınıb. Bu müraciətin müzakirəyə çıxarılması üçün davamlı olaraq lazımi işləri görsək, onlar da bununla bağlı özlərindən asılı olan bütün addımları atacaqlar”.

Avropa Azərbaycanlıları Konqresinin sədri bildirib ki, bütün bu fəaliyyətlər birbaşa Azərbaycan dövlətinin dəstəyi sayəsində baş tutur: “Bizim bu cəhdlərimizə, fəaliyyətimizə göstərdiyi dəstəyə görə Azərbaycan dövlətinə, prezident İlham Əliyevə, eləcə də Diasporla İş üzrə Dövlət Komitəsinə öz təşəkkürümüzü bildiririk. Bu, Azərbaycan xalqının, Azərbaycan dövlətinin uğurudur”.