İşğal faktı rəqəmlərdə
Dağlıq Qarabağ: işğal tarixi - 1988-1992-ci illər, ərazisi - 4400 kv.km; Şuşa rayonu: işğal tarixi - 8 may 1992-ci il, ərazisi - 289 kv.km; Laçın rayonu: işğal tarixi - 18 may 1992-ci il, ərazisi - 1840 kv.km; Kəlbəcər rayonu: işğal tarixi - 2 aprel 1993-cü il, ərazisi - 3054 kv.km; Ağdam rayonu: işğal tarixi - 23 iyul 1993-cü il, ərazisi - 1150 kv.km; Cəbrayıl rayonu: işğal tarixi - 23 avqust 1993-cü il, ərazisi - 1050 kv.km; Füzuli rayonu: işğal tarixi - 23 avqust 1993-cü il, ərazisi - 1390 kv.km; Qubadlı rayonu: işğal tarixi - 31 avqust 1993-cü il, ərazisi - 802 kv.km; Zəngilan rayonu: işğal tarixi - 29 oktyabr 1993-cü il, ərazisi - 707 kv.km.

Baş nazirin müavini beynəlxalq təşkilatları Azərbaycanla oyun oynamağa son verməyə çağırıb

Baş nazirin müavini beynəlxalq təşkilatları Azərbaycanla oyun oynamağa son verməyə çağırıb

23.07.2014

«Beynəlxalq təşkilatlar münaqişəni həll edə bilmirsə, çəkilsinlər kənara, iki qonşu dövlət öz arasında bu məsələni həll etsin».

APA-nın məlumatına görə, bunu baş nazirin müavini, Qaçqın və Məcburi Köçkünlərin İşləri üzrə Dövlət Komitəsinin sədri Əli Həsənov Ağdam rayonunun Ermənistanın hərbi təcavüzü nəticəsində işğalının 21-ci ildönümü ilə əlaqədar keçirilən anım mərasimində deyib.

Ə. Həsənovun sözlərinə görə, nə qədər Ermənistandakı rejim dəyişməyib, beynəlxalq təşkilatlar başa düşməlidir ki, danışıqlar nəticə verməyib, verməyəcək.

«Köçəryan, Sərkisyan bizim insanlarımızın qanı üstündə hakimiyyətə gəliblər. Onlar bu məsələnin həllinə gedər? Onlar bu məsələnin həllinə gedən kimi hakimiyyətlərinə son qoyulacaq. Bunu ATƏT-in həmsədr dövlətləri də gözəl bilir», - deyə baş nazirin müavini əlavə edib.

Ə. Həsənov beynəlxalq təşkilatları Azərbaycanla oyun oynamağa son verməyə çağırıb: «Kifayətdir, bizimlə bu cür siyasi oyunlar oynadınız. Doğrudan da, ermənilər insan kimi yaşamaq, Azərbaycanın imkanlarından bəhrələnmək, azərbaycanlılarla qonşuluq etmək istəyirlərsə, o rejimdən azad olmalıdırlar. Əks halda, problemin həlli yoxdur. Mən dəfələrlə beynəlxalq təşkilatlara demişəm ki, “Problemi kimin törətdiyini yaxşı bilirsiniz. Siz bilirsiniz, məsələnin həllinə mane olan kimdir. Problemi həll etməyə gücünüz çatmırsa, gedin Ermənistan məsələsini həll edin. Ona gücünüz çatmırsa, erməni diasporundan qorxursunuzsa, onda çəkilin kənara, iki ölkəni, iki xalqı qoyun qarşı-qarşıya, heç bir insident olmayacaq”. Yalandan deyirlər ki, qıracaqlar bir-birini. Heç nə olmayacaq, biz Allah tərəfindən qonşuluqda yaşamağa məhkum edilmişik. Torpağı götürüb aparmaq mümkün deyil. Yüz illərdir, qonşu kimi yaşamışıq, yenə yaşayacağıq».

Ə. Həsənov qeyd edib ki, S. Sərkisyan erməni xalqını dilənçi kökünə salıb: «Bir müddət əvvəl Sərkisyanın Avropa Şurasına çıxışına görə biz də utandıq. Nə qədər olmasa, Cənubi Qafqazdanıq”.