İşğal faktı rəqəmlərdə
Dağlıq Qarabağ: işğal tarixi - 1988-1992-ci illər, ərazisi - 4400 kv.km; Şuşa rayonu: işğal tarixi - 8 may 1992-ci il, ərazisi - 289 kv.km; Laçın rayonu: işğal tarixi - 18 may 1992-ci il, ərazisi - 1840 kv.km; Kəlbəcər rayonu: işğal tarixi - 2 aprel 1993-cü il, ərazisi - 3054 kv.km; Ağdam rayonu: işğal tarixi - 23 iyul 1993-cü il, ərazisi - 1150 kv.km; Cəbrayıl rayonu: işğal tarixi - 23 avqust 1993-cü il, ərazisi - 1050 kv.km; Füzuli rayonu: işğal tarixi - 23 avqust 1993-cü il, ərazisi - 1390 kv.km; Qubadlı rayonu: işğal tarixi - 31 avqust 1993-cü il, ərazisi - 802 kv.km; Zəngilan rayonu: işğal tarixi - 29 oktyabr 1993-cü il, ərazisi - 707 kv.km.

Azərbaycan XİN: Ermənistan xarici işlər naziri yenə də cəfəng söz oyunu ilə məşğuldur

Azərbaycan XİN: Ermənistan xarici işlər naziri yenə də cəfəng söz oyunu ilə məşğuldur

30.08.2017

Ermənistan xarici işlər naziri yenə də cəfəng söz oyunu ilə məşğuldur. Bundan əvvəlki açıqlamaları ilə özünü pis duruma qoyan Ermənistan xarici işlər naziri indi vəziyyətdən çıxmaq üçün yenə müxtəlif yalan və bəhanələrə əl atır.

Bunu Trend-in sorğusuna cavab olaraq XİN-nin mətbuat xidmətinin rəhbəri Hikmət Hacıyev bildirib.

H.Hacıyev deyib ki, ATƏT-in Minsk Qrupunun ABŞ-dan olan həmsədri Riçard Hoaqland tərəfindən münaqişənin həlli ilə əlaqədar səsləndirilən prinsiplər ATƏT-in digər həmsədr ölkələri tərəfindən də dəstəklənir və münaqişənin mərhələli həllini nəzərdə tutur:

"Helsinki Yekun Aktı əsasında hazırlanan bu prinsiplərin mahiyyəti və məntiqinə görə birinci addım olaraq Azərbaycanın Dağlıq Qarabağ bölgəsi ətrafındakı işğal edilmiş rayonlardan Ermənistan Silahlı Qüvvələri çıxarılmalı və məcburi köçkünlər qayıtmalıdırlar. Bu prinsiplər ATƏT-in Minsk Qrupunun həmsədr ölkələrinin prezidentləri səviyyəsində Akvil, Muskoka, Los-Kabosda verilmiş bəyanatlarda təsbit olunub.

Ən əsası odur ki, Ermənistan qoşunlarının Azərbaycanın işğal edilmiş ərazilərindən dərhal, tam və qeyd-şərtsiz çıxarılması BMT Təhlükəsizlik Şurasının 822, 853, 874 və 884 saylı qətnamələrində təsbit olunub. ATƏT Minsk Qrupunun həmsədr ölkələri BMT TŞ-nın daimi üzvləri olaraq bu qətnamələrin qəbul olunmasında birbaşa iştirak ediblər.

Ermənistan xarici işlər nazirinə xatırlatmaq istərdik ki, predmetli danışıqların mahiyyətini bu prinsiplərə və konkret vaxt qrafikinə uyğun olaraq Ermənistan qoşunlarının Azərbaycanın işğal edilmiş ərazilərindən çıxarılması təşkil edir".

XİN rəsmisinin sözlərinə görə, Ermənistan tərəfi ittiham və bəhanələr irəli sürmək əvəzinə qəbuledilməz olan status-kvonun dəyişdirilməsi üçün ATƏT-in Minsk qrupunun həmsədrlərinin mövcud təklifləri əsasında Azərbaycan tərəfi və həmsədrlərlə birlikdə substantiv danışıqlara qatılmalı, öz qoşunlarını Azərbaycanın işğal olunmuş ərazilərindən çıxamalı və regionda sülh şəraitində birgə yaşayış və çiçəklənmə üçün imkanlara yol açmalıdır:

"Azərbaycan dəfələrlə bəyan edib ki, münaqişənin tezliklə həlli və qəbuledilməz olan status kvonun dəyişdirilməsi üçün substantiv və ciddi danışıqlara hazırdır".