İşğal faktı rəqəmlərdə
Dağlıq Qarabağ: işğal tarixi - 1988-1992-ci illər, ərazisi - 4400 kv.km; Şuşa rayonu: işğal tarixi - 8 may 1992-ci il, ərazisi - 289 kv.km; Laçın rayonu: işğal tarixi - 18 may 1992-ci il, ərazisi - 1840 kv.km; Kəlbəcər rayonu: işğal tarixi - 2 aprel 1993-cü il, ərazisi - 3054 kv.km; Ağdam rayonu: işğal tarixi - 23 iyul 1993-cü il, ərazisi - 1150 kv.km; Cəbrayıl rayonu: işğal tarixi - 23 avqust 1993-cü il, ərazisi - 1050 kv.km; Füzuli rayonu: işğal tarixi - 23 avqust 1993-cü il, ərazisi - 1390 kv.km; Qubadlı rayonu: işğal tarixi - 31 avqust 1993-cü il, ərazisi - 802 kv.km; Zəngilan rayonu: işğal tarixi - 29 oktyabr 1993-cü il, ərazisi - 707 kv.km.

Avropalı diplomatlar Dilqəm Əsgərov və Şahbaz Quliyevlə bağlı məsələni diqqətdə saxlayacaq

Avropalı diplomatlar Dilqəm Əsgərov və Şahbaz Quliyevlə bağlı məsələni diqqətdə saxlayacaq

25.09.2017

Azərbaycanın işğal altında olan Kəlbəcər rayonunda yaxınlarının məzarlarını ziyarət etmək üçün doğma yurdlarına getdikləri zaman Ermənistan silahlı qüvvələri tərəfindən girov götürülən Dilqəm Əsgərov və Şahbaz Quliyevin hüquqlarının müdafiə komitəsi bu gün mətbuat konfransı keçirib.

Trend-in məlumatına görə, mətbuat konfransında D.Əsgərov və Ş.Quliyevin azad edilməsi istiqamətində aparılan işlər, o cümlədən D.Əsgərovun oğlu Kürdoğlu Əsgərovun Varşavada ATƏT-in sammitində çıxışı barədə məlumat verilib.

K.Əsgərov bildirib ki, sammitdə D.Əsgərov və Ş.Quliyevin girovluqdan azad edilməsi məsələsi gündəmə gətirilib: “Atamın Rusiya pasportunu götürmüşdük. Oradan rusiyalı deputatlara da səsləndik ki, Dilqəm Əsgərov Rusiya vətəndaşıdır və siz hara baxırsınız?! Biz sammitdə Dilqəm Əsgərov və Şahbaz Quliyevin saxlanma şəraiti, onların qanunsuz olaraq ermənilər tərəfindən saxlanması barədə məlumat verdik və sammit iştirakçılarının diqqətini bu məsələyə cəlb etməyi bacardıq”.

K.Əsgərov deyib ki, avropalı diplomatlar ölkələrində də bu məsələni qaldıracaqlarını və diqqətdə saxlayacaqlarını bildiriblər: “Avropalı diplomatların diqqətini cəlb etməyi bacardıq, onlarla ayrı-ayrılıqda da görüşdük və ətraflı məlumat verdik. Avropalı diplomatlar söz verdilər ki, bu məsələni diqqətdə saxlayacaqlar”.

Qeyd edək ki, 2014-cü ilin iyul ayında Rusiya vətəndaşı D.Əsgərov və Azərbaycan vətəndaşı Ş.Quliyev Kəlbəcərdə öz ata-baba yurdlarını ziyarət etmək istəyərkən Ermənistan əsgərləri tərəfindən girov götürülüblər, onlarla birlikdə olan Azərbaycan vətəndaşı Həsən Həsənov isə güllələnərək öldürülüb.

İşğal altındakı Dağlıq Qarabağda D.Əsgərov və Ş.Quliyev üzərində qanunsuz “məhkəmə” qurulub. “Məhkəmə”nin qərarı ilə D.Əsgərov ömürlük, Ş.Quliyev isə 22 il müddətinə azadlıqdan məhrum edilib.